Dokument-Nr. 11459
Fritz, Karl an Pius XI.
Freiburg im Breisgau, 09. Oktober 1922

Beatissime Pater!
Carolus Fritz, Archiepiscopus Friburgensis, ad pedes Tuae Sactitatis provolutus, haec quae sequuntur, humillime proponit:
Ineunte h. a. mense Novembri Caritatis Unio pro Germania catholica ("Caritas-Verband für das katholische Deutschland") Coloniae Agrippinae quinque existentiae lustra se attigisse gaudebit, cuius inter meritissimos officiales computandos est praeclarus vir Arturus Hugo Klieber, pr. t. director generalis, qui inde a 1. Junii 1904 post diuturna studia oeconomiae publicae officium Caritatis centrale Friburgi ingressus industria constantissima, providentia et virtute eximia, Plur. Rev. Dno Dr. Laurentio Werthmann b. m. praelato duce, praeclara Caritatis Unionis consilia ad effectum perducebat. Decem per annos praeter officii centralis munia Conferentias Vincentianas promovit compluraque milia omnis generis egenorum recepit, quibus consiglio, opere, labore aderat.
Permagno studio usque ad initium funesti belli opi-
223v
ficibus, mercatoribus, artificibus Italicis Friburgi aliisque in regionibus imperii Germanici degentibus prospiciens, supplicationes eorum ad officiales et curiales redegit admodumque magnas cura set angustias lenivit. Una cum "opera Bonomelli", Italici utpote sermonis gnarus, folia periodica, quibus nomen "La Patria", librosque edens italicorum catholicorum emigrantium necessitatibus religiosis subveniebat, unaque cum Dno Dr. Werthmann praelato peregrinationes pias quas fideles ad S. Urbem, Lauretum et ad sacrum B. M. V. in Lourdes facere solent, dirigendas suscipiebat.
Quae Dni Klieber actio caritativa tanto amplior evasit, quanto bello universali necessitates augustiaeque populi Germanici magis magisque creverunt. Inde ab ipso initio belli Friburgi officium auxiliatorium et consultativum pro militibus belligerantibus condens, saepe plura centena egentium una die recipiebat et permulta dona caritativa et complura centena milia librorum et foliorum periodicorum ad frontem misit. Verum etiam domi durante bello et post illius exitialem exitum Klieber in collocandis infantibus egenis et in alimentis colligendis plurimum laboravit.
Opus autem illius praecipuum considerandum est, quod in re pecuniaria Unioni Caritatis operationis suae fines amplius extendere et complura opera magna caritativa coëmere licuit,
224r
quae et egentium saluti et Unionis institutis prospectura sint.
Quam amplam meritoriamque huius viri in re quippe ecclesiastica caritatis diligentiam aestimans, Beatitudinem Tuam enixe instanterque rogo, ut occasione Jubilaei quod vocant "argentei" Caritatis Unionis instantis suprema auctoritas ecclesiastica merita illius comprobare et illum cruce honoraria "Pro Ecclesia et Pontifice" decorare dignetur. Quae Sedis apostolicae benevolentia certe in Rei catholicae Caritativae incrementum cedet.
Pro qua gratia etc.
Sanctitatis Vestrae
humillius servus et in Christo filius
Carolus Fritz
Archiepiscopus Friburgensis.
Empfohlene Zitierweise
Fritz, Karl an PiusXI. vom 09. Oktober 1922, Anlage, in: 'Kritische Online-Edition der Nuntiaturberichte Eugenio Pacellis (1917-1929)', Dokument Nr. 11459, URL: www.pacelli-edition.de/Dokument/11459. Letzter Zugriff am: 28.03.2024.
Online seit 23.07.2014.