Dokument-Nr. 15874
Henle, Antonius von
an Pius XI.
Regensburg, 18. Juli 1922
Antonius de Henle episcopus Ratisbonensis ad pedes Sanctitatis Vestrae provolutus humillime exponit, quae sequuntur:
Duo loca solitaria, quae ad paroeciam Hörbering archidioecesis Monacensis-Frisingensis pertinent, nominibus Niedermoosen et Grosskirchstetten, ab eadem paroecia dismembrari et paroeciae Binabiburg dioecesis Ratisbonensis uniri volunt.
Duo loca distant ab Hörbering circiter 4 km, a paroecia Binabiburg 2 km. Parvuli ex his locis jam dudum scholam publicam in expositura Wiesbach, paroecia Binabiburg, frequentant et a cooperatore illuc exposito catechizantur. Ipsi adulti frequentant divina et accipiunt sacramenta in ecclesia filiali Wiesbach, ubi etiam subsellia realia habent. Paroecia Hörbering continet 690, Binabiburg 940 fideles. Ad curam animarum in paroecia Binabiburg parochus et cooperator expositus exstant. Fines dioecesium per fundum agrarium illorum duorum locorum definitive construentur, sed mutatio non erit magni momenti. Ambo loca ad communitatem civilem Tambach pertinent. Huc accedit, ut Ministerium status Bavarici jam calendis Juniis hujus anni rebus exquisitis et consideratis consensum politicum ad dismembrationem dederit.
Quoniam praesul Monacensis-Frisingensis dismembrationi
3v
assentitur, enixe rogo, ut Sanctitas Vestra benigne concedere dignetur duo loca solitaria quoad fines novos inducendos a paroecia Hörbering et archidioecesi Monacensi-Frisingensi avelli et sejungi atque paroeciae Binabiburg dioecesis Ratisbonensis perpetuo attribui et uniri.Summa qua par est reverentia persistens
Sanctitati Vestrae
obsequiosissimus
(sig.) Antonius,
Episcopus Ratisbonensis.
(loco sigilli)